Rembulan sakwaliking Gumuk

Nalika pathet wus ngancik Manyura
Kekesing maruta bangun esuk kang miyak sepining panggantha
Ing netra mung kadulu sunare Hyang Rawi ing sawalike gumuk

Larasnya winalik Barang
Asung usada kang nedheng kapang
Lintang-lintang sumawur ing tawang padha ilang
Liringnya esemu kalingseman

Dhuh........, Sitoresmi kang manjer kawuryan
Dak sampirake pangajab, gegayuhan lan pepinginan ing cahyamu
Reroncening panggantha, lawan bundhelaning rasa wus dak cancang ing sorotmu
Gondhelana nganggo endahing sunarmu

Aja nganti luput
Aja nganti mrucut
Rakitaning panggantha panguwuhing rasa
Dhadhungana nganggo prasapa lan talenana nganggo prasetya

Rembulanku......
Sorotmu kejeting jantungku
Sunarmu laksitaku
Cahyamu pituduhku



SALA, Sukra Langking 19 Jumadilawal 1947Alip